The Obamas and Work-Family Balance

Baka sabihin nyo naman, puro personal na lang ang nilalagay ko sa blog na ito. Kahit pa sabihing "the personal is political", syempre me conscious effort pa rin naman sa parte ko na iugnay ang buhay ko sa ngalan ng national (global) interest hehe.

Sa pag-upo ni Barack Obama bilang pangulo ng Estados Unidos, hindi maiiwasan na pagtuunan din ng pansin ang kanyang personal na buhay. Ayon sa isang artikulo sa New York Times, isang matingkad na isyu sa kanila ang work-family balance lalo na at me mga batang anak sila. Sinundan nya si JFK na me mga batang anak din noong inokupa nito ang White House. Balita kung saan mag-aaral sina Sasha at Malia. Hindi na rin bago yung mga kamag-anak na kasamang titira sa White House. Doon daw titigil ang biyenan ni Obama. Pati ang pagpili nila ng alagang aso ay malaking isyu. At syempre, lahat ay nakatuon din ke Michelle, hindi lang dahil magaling syang manamit kundi kung ano ang magiging papel nya bilang First Lady kumpara sa mga nauna sa kanya.

Matatandaang nagbitiw sya sa trabaho upang ibuhos ang panahon sa pag-aaruga sa kanyang dalawang anak (mom-in-chief) at gampanan ang kanyang tungkulin bilang First Lady. May ibang kritiko na nagsasabi na dapat hindi na lang sya pumwesto sa backseat pabor sa kanyang asawa. Me sariling career din naman sya. Pero double-edged sword na naman. Pag naman pinagpatuloy nya ang kanyang career, sasabihan na walang pagpapahalaga sa pamilya.

Sa lifetime ng babae, pwede namang magkaroon ng mga shift depende sa sitwasyon. Choice nya yon. Choice nya kung gusto nyang maging "housewife". Dangan nga lang at may stigma pag sinabing housewife: walang ginagawa, sa bahay lang, umaasa na lang sa asawa. Kung tutuusin, parehong trabaho rin naman ang gawaing bahay at trabaho sa labas nito. Yun nga lang, walang katumbas na bayad ang gawaing bahay. Dahil dito, hindi ito napahahalagahan.

Choice din ng babae kung gusto nyang pumalaot sa paid work. Sa middle at upper classes, isyu ito ng independence, fulfillment, self worth. Sa lower classes, mas isyu ng survival. Mahirap ang buhay. Sa mag-asawa/magkapareha, dual-earning o magkatuwang sa paghahanapbuhay. Iba't iba nga depende sa sitwasyon at mga salik katulad ng edad, kasarian, nasyunalidad/etnisidad, uri.

Sa working mothers, mas burden ang sinasabing work-life balance. Bago pumasok sa trabaho, kailangan munang magluto at asikasuhin ang asawa at mga anak. Pag-uwi, ganun din. Kapag me nagkasakit, kapag me PTA meeting, sya ang kalimitang nag-iintindi. Lumiliban sya sa trabaho.

Antabayanan na lang kung ano pang mga aksyon ang gagawin ni Barack tungkol sa women's agenda pati na rin ng kanyang asawang si Michelle.